MANILA , Philippines – Hinimok ng
spokesman ng Department of the Interior and Local Government (DILG) si Pasig
City Mayor Vico Sotto ngayong Huwebes lamang, March 19, 2020, na alamin ang iba
pang pamamaraan ng ibang local government units kung paano nila nasosolusyonan
ang problema sa transportasyon.
Naging usapin ng maraming netizens
kung bakit hindi pinayagan ang hangarin ni Mayor Vico Sotto na gamitin ang
tricycle bilang transportasyon para sa mga health workers at sa mga tao ng Pasig.
Sa isang pagpupulong ng press nito
lamang Huwebes, ginawang basehan ni Undersecretary Jonathan Malaya ang ginawa
ng Parañaque City kung pano nito natugunan ang pangangailangan sa
transportasyon ng mga frontline health workers. Gumamit ang siyudad ng buses ng
mga hotels imbis na tricycles.
Ayon naman kay Malaya, kung ito lang
naman ay para sa mga health workers, maaring tumingin ang gobyerno ng Pasig sa
ibang ginagawa ng lungsod.
"Kung
ang purpose po natin ay health workers, sana po tingnan ng lungsod ng Pasig
'yung ginawa ng ibang lungsod... For example po sa Parañaque po, humiram sila
ng bus sa Okada at City of Dreams at sa Solaire, 'yung lahat ng bus gumawa sila
ng ruta... doon nila pinapasakay ang kanilang health workers." –
Malaya.
Giit pa
ni Malaya na hindi din pinayagan ang ibang lungsod na gumamit ng tricycle.
"Ang
Parañaque ba ay pinayagan ang mga tricycle? Hindi. Sa Quezon City ba pinayagan
ang tricycle? Hindi rin. Ang hindi ko po maintindihan, kung nagagawan po ng
paraan ng ibang LGU na makagawa ng sistema ng paghahatid ng health workers sa
kanilang pupuntahan, bakit hindi magawa ng Pasig?" - dagdag
ni Malaya.
Nitong
nakaraan lamang, nakiusap si Sotto sa national government na ibukod ang mga tricycle
sa pagbabawal bilang transportasyon pampubliko sa gitna ng enhanced quarantine
sa Luzon. Sabi pa ni Sotto na pinayagan nya umano ang mga ito na bumyahe sa
kanyang nasasakupan para matulongan ang mga health workers at magamit ng mga
pasyente sa ospital ng nasabing lungsod.
Samantala,
pahayag ni Malaya na hindi ito maaring payagan ng national government dahil
mawawalan ng silbi ang layunin ng Luzon quarantine. Dagdag pa niya, maaring
gayahin ito ng iba pang lokal na gobyerno.
"Pasensya
na po, Mayor. Hindi po talaga namin kayo puwedeng pabigyan. Kasi po if we allow
mass transportation in Pasig, mamaya po magrerequest na ang Valenzuela, ang
Cabuyao, magrerequest na po ang lahat..." – Malaya.
Sa
karagdagang pahayag ni Malaya, marami naman umanong sasakyan ang Pasig na
pwedeng magamit para sa medical personnel.
"I-pullout
niyo po 'yung binigay niyong sasakyan sa DepEd, 'yung binigay niyong sasakyan
sa OWWA." – wika ni Malaya.
Ayon
naman kay Cabinet Secretary Karlo Nograles, mahirap umanong ipatupad ang social
distancing sa mga tricycles.
